LLENAS, A (2012). O Monstro das cores. Barcelona: Flamboyant.
O Monstro das cores fíxose unha maraña coas súas emocións. Agora o que necesita é
desfacer este difícil enredo.
Para traballar as emocións, a autora relaciona cada un dos sentimentos cunha cor
representativa, ademais de establecer sinestesias, unha figura retórica mediante a cal
se lle atribúen a un obxecto características que se perciben por medio dos sentidos,
por exemplo adxudicándolle á alegría trazos propios do sol ou á rabia aspectos
relacionados con lume.
As emocións son un dos aspectos fundamentais nas nosas vidas e teñen especial
importancia, sobre todo na etapa de Educación Infantil, xa que é cando comezamos a
formar a nosa personalidade. Por iso entendemos que é necesario que se atendan,
axúdanos esta historia a iso.
En relación co anterior, entendemos que para moitos pais e nais o tema das emocións
é moi difícil de tratar e, incluso nalgúns casos, para nós como mestres. Por este
motivo debemos coidar a identificación e a capacidade resolutiva dos seus
sentimentos.
Con este álbum ilustrado non so abordamos o tema dunha forma motivadora, senón
que fai que entendan facilmente o que se sente en cada un dos estados de ánimo,
acertando a autora a explicalas a través das cores dunha maneira sinxela. Esta
definición das emocións a partir de algo que xa é coñecido, como o son as cores,
axudará a identificar cada unha delas con maior facilidade.
Ademais, é moi útil para que os nenos e nenas entendan que chorar, estar triste ou
sentir medo non é nada malo, xa que todos os sentimentos xorden por algo e debemos
xestionalos da mellor maneira posible. Xunto con isto, aprenderán que as emocións
son imprescindibles na vida e que expresalas é moi bo, xa que exteriorizan o que lles
pasa.
A pesar de ser un libro dirixido a público infantil, a nós como adultos tamén nos
axudou a comprender que expresar as nosas vivencias é necesario e axuda a afrontar o
que nos está a suceder e buscarlle a solución máis beneficiosa para nós, polo que
debemos facelo de adultos. Dicimos isto, porque entendemos que a medida que
maduramos, perdemos a capacidade de expresar os nosos sentimentos e emocións, xa
que as convencións sociais vannos encamiñando a ocultar as mesmas. Ademais,
tamén se mostra a importancia de deixar que os demais nos axuden a identificar os
sentimentos se temos unha sela nos nosos miolos, como lle pasa ao monstro, pedindo
achega se a necesitamos.
Por estes e outros motivos sentimentais, esta obra é unha das nosas favoritas para
traballar na aula xa que, para ser adultos felices debemos coidar a capacidade de
asimilación das nosas emocións xa dende a etapa infantil.
